Storja

1864 – Twaqqif tas-Soċjetà Mużikali Santa Katarina V.M. bit-tħabrik tal-Kappillan Dun Vinċenz Schembri u taħt id-direzzjoni tas-Surmast Luigi Carabott.

1866 – Mill-Orkestra mwaqqfa fl-1864, twaqqfet il-banda bl-isem “La Filarmonica Del Zurrico” liema banda kienet tieħu sehem fil-festa ta’ Santa Katarina V.M. taħt it-tmexxija tas-Surmast Francesco Zammit.

1883 – “La Filarmonica Del Zurrico” nqassmet fi tnejn fejn waħda mill-baned iffurmati “La Filarmonica Mannarino” taħt it-tmexxija ta’ Mro. Ignazio Catania kienet tieħu sehem fil-festa ta’ Santa Katarina V.M.

1883-It-tmexxija tas-Soċjetà Mużikali Santa Katarina V.M. għaddiet f’idejn il-President Zaccaria Roncalli LLD

1893 – It-tmexxija tas-Soċjetà Mużikali Santa Katarina V.M. għaddiet f’idejn il-President Carmelo Ellul

1895 – Iż-żewġ Baned taż-Żurrieq jiġifieri  ‘La Filarmonica Mannarino’ u ‘La Filarmonica del Cavalier’ ġew xolti u fiż-Żurrieq twaqqfet banda oħra ġdida bl-isem “La Concordia” taħt it-tmexxija tas-Surmast Carmelo Zammit.

1899- It-tmexxija tas- Soċjetà Mużikali Santa Katarina V.M. għaddiet f’idejn il-President Giuseppe Vella

1899 – Is-Sede tal-Każin tal-Banda kien f’ numru 123 Triq Irjali taħt l-isem “Circolo Santa Caterina”.

1900 – Il-Kumitat taċ-“Circolo Santa Caterina” iddelega lis-Surmast Nikola Montebello biex jieħu ħsieb l-Orkestra Santa Katarina.

1903-It-tmexxija tas- Soċjetà Mużikali Santa Katarina V.M. għaddiet f’idejn il-President Antonio Mangion

1905– It-tmexxija tas- Soċjetà Mużikali Santa Katarina V.M. għaddiet f’idejn il-President Vincenzo Grixti

1906 – Is- Soċjetà Mużikali Santa Katarina V.M. kellha kemm banda kif ukoll orkestra.  Fl-assenza tas-Surmast Nikola Montebello minħabba mpenji tiegħu fin-navy, is-Surmast Francesco Zammit kien jieħu l-inkarigu minfloku.

1908 – It-tmexxija tas- Soċjetà Mużikali Santa Katarina V.M. għaddiet f’idejn il-President Giuseppe Muscat

1909 – Is-Surmast Nikola Montebello kompla l-inkarigu tiegħu bit-tmexxija tal-Banda Santa Katarina V.M.  Il-membri ħatru lil Francesco Zammit bħala Assistent Surmast.

1910 – Il-Banda Santa Katarina V.M. żżanżan l-uniformi il-ġdida.

1912 – Is-Sede tal-Każin mexa għal numru 20 Piazza Maggiore, Zurrieq illum “Palazz Alexandria”.

1920– It-tmexxija tas- Soċjetà Mużikali Santa Katarina V.M. għaddiet f’idejn il-President Giovanni Mallia

1920 – Minħabba l-emigrazzjoni, l-Banda Santa Katarina V.M. ġiet mibdula f’ Orkestra taħt l-isem “Orkestra Santa Katarina” bit-tmexxija tas-Surmast Ferdinandu Falzon.

1920 – F’ Settembru l-Orkestra ħadet sehem fil-pjazza ta’ Ħal-Safi fl-okkażjoni tal-inawgurazzjoni tal-qniepen.

1923-It-tmexxija tas- Soċjetà Mużikali Santa Katarina V.M. għaddiet f’idejn il-President Giuseppe Saydon P.H.C.

1923 – Il-Kumpanija Teatrali “La Pace” bdiet ittella’ is-serati tagħha fil-Każin tas-Soċjetà u nafu li bejn l-1923 u l-1944, waqt l-intervalli ta’ dawn is-serati kienet tieħu sehem l-“Orkestra Santa Katarina”.

1924 – L-Orkestra Santa Katarina ħadet sehem fiċ-ċerimonja tal-pussess tal-Arċipriet Giovanni Battista Ghigo.

1930– It-tmexxija tas- Soċjetà Mużikali Santa Katarina V.M. għaddiet f’idejn il-President Carmelo Pace

1930 – Mill-Minuti tas-Soċjetà u mill-programmi tal-Kumpanija “Rossini” nafu li l-Orkestra kienet ukoll iddoqq taħt forma ta’ Jazz Band.

1940 – L-Orkestra Santa Katarina kienet iddoqq fil-mutett tat-Tridu u fil-matutin tal-festa ta’ Santa Katarina u baqgħet tieħu sehem sas-sena 1943.

1944 – L-Orkestra għaddiet taħt it-tmexxija tas-Surmast Espedito Deguara.

1946 – L-Orkestra Santa Katarina reġgħet ġiet mibdula f’Banda taħt l-isem “Banda Santa Katarina V.M.”

1947– It-tmexxija tas- Soċjetà Mużikali Santa Katarina V.M. għaddiet f’idejn il-President Anthony Zammit

1948– It-tmexxija tas- Soċjetà Mużikali Santa Katarina V.M.  għaddiet f’idejn il-President Carmelo Pace

1954 – Il-Banda Santa Katarina V.M. ddoqq f’ Noto, Sqallija.

1955 – Il-Banda Santa Katarina V.M. ddoqq f’ Acireale, Sqallija.

1956 – Jiżżanżan il-Planċier Artistiku tal-Banda Santa Katarina V.M.

1959 – Il-Banda Santa Katarina V.M. ddoqq f’ Catania, Sqallija.

1960 – Jittella’ għall-ewwel darba mis-Soċjetà Mużikali Santa Katarina V.M. id-Dramm ‘Santa Katarina Verġni u Martri’ mill-pinna tal-Profs. Pietru Pawl Saydon

1962– Is- Soċjetà Mużikali Santa Katarina V.M. flimkien mal-Banda tagħha tat l-aħħar tislima lis-Sur Salvu Bugeja wara li tilef ħajtu f’inċident tan-nar

1966– It-tmexxija tas- Soċjetà Mużikali Santa Katarina V.M. għaddiet f’idejn il-President Salvu Callus

1971-Is- Soċjetà Mużikali Santa Katarina V.M. flimkien mal-Banda tagħha tat l-aħħar tislima lill-aħwa Sinjuri Ġużeppi Sammut u Karmenu Sammut wara li tilfu ħajjithom f’inċident fil-post tan-nar

1978– Is- Soċjetà Mużikali Santa Katarina V.M. flimkien mal-Banda tagħha tat l-aħħar tislima lis-Sur Anglu Camilleri wara li tilef ħajtu f’inċident tan-nar

1979 – Titħabbar il-mewt tal-President tas-Soċjetà, is-Sur Salvu Callus fejn imbagħad minfloku ġie maħtur il-President Karmenu Zerafa. Wara s-Seduta Generali tat- 28 t’Ottubru 1978, is-Soċjetà għaddiet taħt it-tmexxija tal-President Ġużeppi Gauci.

1980 – Titwaqqaf l-ewwel Sezzjoni Nisa fiż-Żurrieq fi ħdan is- Soċjetà Mużikali Santa Katarina V.M. 

1986 – Il-Banda Santa Katarina V.M. tgħaddi taħt it-tmexxija tas-Surmast Francis Falzon.

1986 – Ġie nawgurat il-kumpless il-ġdid tan-Nar bl-isem”St.Catherine Fireworks Factory”.

1987 – Is-Soċjetà tgħaddi taħt it-tmexxija tal-President David Zerafa.

1989 – Is-Soċjetà Mużikali Santa Katarina V.M. tfakkar il-125 sena mit-twaqqif tagħha. Fl-istess sena l-Banda Santa Katarina V.M. iddoqq fit-Teatru Manoel.

1990 – Is-Soċjetà tgħaddi taħt it-tmexxija temporanja tal-Aġent President is-Sur Joseph Saliba, fejn imbagħad ġie maħtur bħala President is-Sur Ġużeppi Camilleri. F’Novembru ta’ din is-sena, il-Banda Santa Katarina V.M. iddoqq fit-Teatru Manoel fl-okkażjoni tal-Festa ta’ Santa Ċeċilja.

1991 – Inxtara is-sede tas-Soċjetà Mużikali Santa Katarina V.M. A.D. 1864.

1992 – Titwaqqaf l-Ewwel Sezzjoni Żgħażagħ fiż-Żurrieq fi ħdan is- Soċjetà Mużikali Santa Katarina V.M. 

1993 – Is-Soċjetà tgħaddi taħt it-tmexxija tal-President Charlie Schembri.

1997 – Jittella’ l-Musical ‘Jisimni Katarina’ minn fuq id-Dramm miktub mill-Profs. Pietru Pawl Saydon. Il-mużika ta’ dan il-musical inkitbet mis-Sur Mark Tonna u l-addattament tal-lirika sar mis-Sur Joseph Chircop. Dan id-Dramm ittella’ mis-Sezzjoni Żgħażagħ Palmisti.

1997 – Il-Banda Santa Katarina V.M. ddoqq f’Bari, l-Italja.

1997 – Is-Soċjetà tgħaddi taħt it-tmexxija tal-President Anthony Bonnici.

2000 – Jitwaqqaf is-sotto Kumitat Armar

2002 – Delegazzjoni tas-Soċjetà Mużikali Santa Katarina V.M. f’udjenza mal-Qdusija tiegħu il-Papa Gwanni Pawlu II fil-Vatikan.

2002 – Beda jixxandar l-ewwel radju tal-komunità fiż-Żurrieq, Radju Santa Katarina.

2004 – Il-Banda Santa Katarina V.M. tagħmel Ġemellaġġ mużikali ma’ “La Filarmonica Pietro Mascagni” ta’ Camporgiano, provincja ta’ Lucca, l-Italja.

2004 – Iżżanżan l-Arkivju tal-Banda Santa Katarina V.M. f”Palazz Alexandria’ mill-President ta’ Malta E.T. Dr. Edward Feench Adami.

2005 – Festi Kbar fl-1700 sena mill-Martirju tal-Patruna tagħna Santa Katarina V.M.

2005 – Ftuħ tal-maħżen il-ġdid, ‘Maħżen Santa Katarina’

2005 – Inawgurazzjoni tal-pedestall il-ġdid li fuqu ser jiqiegħdu l-istatwi tal-Papa Ġwanni Pawlu II flimkien ma’ Santa Katarina mdawwar b’4 anġli.

2006- Imfakkar il-50 Anniversarju mill-inawgurazzjoni tal-Planċier Artistiku tas-Soċjetà. Għal din l-okkażjoni il-Banda Santa Katarina V.M., taħt id-direzzjoni tas-Surmast Francis Falzon u l-patroċinju tal-President ta’ Malta E.T. Dr. Edward Fenech Adami, esegwiet kunċert mużikali. Wara l-President ta’ Malta ppreżenta tifkira lill-erba’ mill-imgħallmin ħajjin li ħadmu l-planċier u t-tlett bandisti li daqqew fl-inawgurazzjoni tal-istess planċier. Il-President ta’ Malta E.T. Dr. Edward Fenech Adami kixef irħama kommemorativa fil-każin.

2006 – Jitwaqqaf is-Sotto Kumitat Kultura fi ħdan is-Soċjetà Mużikali Santa Katarina V.M.

2007- Fl-okkażjoni tal-Festa Titulari f’ġieh il-Patruna Santa Katarina V.M. inkixfu lapidi fil-każin li jfakkru l-Presidenti u s-Surmastrijiet tas-Soċjetà sa mit-twaqqif tagħha fis-sena 1864.

2007- Il-Banda Santa Katarina V.M. kompliet tiġġedded u tikber fil-popolarità. Din is-sena l-Banda għamlet 22 servizz li 11 minnhom saru fiż-Żurrieq u 11 oħra barra ż-Żurrieq. Għall-ewwel darba l-Banda Santa Katarina V.M. ġiet mistiedna ġewwa n-Nadur Għawdex għall-festa ta’ San Pietru u San Pawl. Il-Banda Mnarja għamlet servizz ġewwa ż-Żurrieq fl-okkażjoni tal-festa titulari ta’ Santa Katarina V.M. 

2007- Is-Sezzjoni Żgħażagħ Palmisti fi ħdan is- Soċjetà Mużikali Santa Katarina V.M. fakkret għeluq il-15 -il sena mit-twaqqif tagħha. Għal din l-okkażjoni saru ħafna attivitajiet kulturali u soċjali. Nhar il-Ħadd 19 t’Awissu 2007 il-Banda Santa Katarina V.M. għamlet marċ fit-toroq taż-Żurrieq sabiex tfakkar dan l-anniversarju tal-ewwel Sezzjoni Żgħażagħ fiż-Żurrieq. Fi tmiem il-marċ is-Sezzjoni Żgħażagħ Palmisti ppreżentaw bandiera ġdida lis-Soċjetà li ttellgħet mal-arblu prinċipali tal-Każin.

2007 – Is-Soċjetà tgħaddi taħt it-tmexxija tal-President Chev. Charles Schembri.

2007-Is-Soċjetà Mużikali Santa Katarina V.M. flimkien mas-sotto kumitati u l-Banda Santa Katarina V.M. taw l-aħħar tislima lis-Sur Nazzareno Barbara u lis-Sur Alfred Cassar wara li tilfu ħajjithom f’inċident fis-St. Catherine Fireworks Factory.

2008 – Tħabbret il-mewt tas-Surmast Direttur Mro. Francis Falzon. Is-Soċjetà Mużikali Santa Katarina V.M. pparteċipat fil-funeral tas-Surmast Direttur Francis Falzon flimkien mal-Banda Santa Katarina V.M. fejn taw l-aħħar tislima lis-surmast tagħha.

2008 – F’Diċembru l-Banda Santa Katarina V.M. għaddiet taħt idejn is-Surmast Mro. Mario Testa u Mro. Josef Grech inħatar bħala Assistent Surmast.

2009 – Il-Banda Santa Katarina wettqet is-sitt safra fl-istorja tagħha ġewwa Budapest fl-Ungerija. Il-Banda Santa Katarina V.M. għamlet kunċerti mużikali f’Halaszbastya, f’Balatonfured u quddiem l-Katidral ta’ Esztergom.

2009 – Is-Soċjetà Mużikali Santa Katarina V.M. tgħaddi taħt it-tmexxija tal-President Philip Schembri.

2009- Jiġu inawgurati studios ġodda għal Radju Santa Katarina

2010 – Jiġi inawgurat armar ġdid fi Vjal il-Blue Grotto fiż-Żurrieq b’disinn innovattiv.

2011 – Jiġi rrestawrat l-Ark Trijonfali mis-Sezzjoni Żgħażagħ Palmisti

2012 – Jitfakkar l-għeluq tal-100 sena minn meta l-Każin tas-Soċjetà Mużikali Santa Katarina V.M. ġie trasferit f’Palazz Alexandria. Il-President ta’ Malta l-E.T. George Abela jżur is-sede tas-Soċjetà u jikxef lapida kommemorattiva

2012 – L-Assistent Surmast Josef Grech jinħatar Surmast Direttur tal-Banda Santa Katarina V.M.

2013 –  Is-Sur Alan Schembri jinħatar Assistent Surmast tal-Banda Santa Katarina V.M.

2013 – Inawgurata s-”Sala Banda Santa Katarina V.M.” fil-Każin tal-Banda Santa Katarina V.M. li fih jinkonpora wkoll Mużew tal-istess Banda.

2014 – Is- Soċjetà Mużikali Santa Katarina V.M. tiċċelebra l-għeluq il-150 sena mit-twaqqif tagħha. Jiġu organizzati diversi attivitajiet u avvenimenti fosthom Akkademja Mużikali fil-Knisja Arċipretali ta’ Santa Katarina V.M., Wirja ”Żurrieq Honours Preti” fil-Każin tal-Banda Santa Katarina V.M., Wirja bl-isem ”Salvu Bugeja – Il-Mużiċist, id-Disinjatur u l-Iskultur”, Blood Donation Day, attività bl-għan filantropiku ”Miż-Żurrieq għall-Istrina”, Kunċert ta’ Mużika Sagra, Serata Mużiko-Letterarja bl-isem ”150 sena – Kullana ta’ Tifkiriet u Melodiji”, re-enactment dwar l-istorja tas-Soċjetà, restawr fuq il-faċċata tal-Każin tal-Banda Santa Katarina V.M., jew aħjar ”Palazz Alexandria”, Festival ta’ Baned, Żurrieq Pop Concert u Christmas Concert ġewwa l-Phoenicia Hotel. Il-Programm Mużikali tal-Festa ta’ dik is-sena kien taħt il-Patronċinju tal-President ta’ Malta E.T. Dr. Marie-Louise Coleiro Preca.

2014 – Il-Banda Santa Katarina V.M. taghmel Ġemellaġġ mużikali ma’ “The Upper Rhine Youth Wind Band” tal-Black Forest fil-Ġermanja. Bejn it-3 u l-10 ta’ Lulju 2014, il-Banda Santa Katarina V.M. daqqet ġewwa l-Black Forest fil-Ġermanja, filwaqt li ”The Upper Rhine Youth Wind Band” daqqet fil-festa ta’ Santa Katarina V.M. bejn it-30 t’Awwissu u t-8 ta’ Settembru 2014.

2016 – Jinkiseb rekord nazzjonali permezz ta’ ħruq ta’ ballun kbir. Dan ir-rekord ġie rikonoxxut mil-Malta Records u ġie mxandar u dokumentat ukoll mill-istazzjon internazzjonali Discovery Science

2018 – Il-Banda Santa Katarina V.M. tieħu sehem waqt l-avveniment Nazzjonali ’Pageant of the Seas’ li kien organizzat mill-Fondazzjoni Valletta 18. Is-Soċjetà rċeviet bandalora storika biex tfakkar din il-parteċipazzjoni tal-Banda Santa Katarina V.M. waqt dan l-avveniment storiku.

2018 – Il-Banda Santa Katarina V.M. bit-tmien impenn internazzjonali fl-istorja tagħha din id-darba ġewwa Schladming fl-Awstrija permezz tas-sehem tagħha fil-Festival Internazzjonali bl-isem ’Mid Europe’.

2018 – Jitfakkar l-għeluq tal-200 sena mill-miġja tal-istatwa Titulari ta’ Santa Katarina V.M. fiż-Żurrieq. Fiż-Żurrieq saru festi kbar li raw il-bidu tagħhom f’Novembru 2017 u ġew fi tmiemhom fil-25 ta’ Novembru 2018. Fost l-avvenimenti li ġew organizzati nsibu li l-Banda Santa Katarina V.M. reġgħet esegwiet l-Oratorju ’Santa Katarina ta’ Lixandra’ fil-Knisja Ariċpretali ta’ Santa Katarina V.M., sar re-enactment bl-isem ’Merħba lill-Gran Mastru’, ġiet organizzata Blood Donation Day flimkien mas-Soċjetà Mużikali Santa Marija tal-Qrendi, saret wirja fil-Każin bl-isem ’Xbiehatek Meqjuma fi Djarna’,sar double album ta’ innijiet lil Santa Katarina V.M., ġie miktub innu ġdid lil Santa Katarina V.M. bl-isem ’Saltan Fostna Katarina’ b’mużika ta’ Mro. Raymond Sciberras u lirika ta’ Fr. John Curmi, sar rekord ta’ 21 servizz minn baned differenti fil-Festa ta’ Santa Katarina V.M. li saret fiż-Żurrieq f’Settembru 2018, sar restawr fuq l-ewwel statwa stradali ta’ Santa Katarina li tinsab fi Triq San Bartilmew fiż-Żurrieq, inħareġ ktieb bl-isem ’Ftit Paġni Sbieħ minn Storja ta’ Raħal’. Saret ukoll Festa Kbira oħra f’Novembru propjament bejn is-16 u l-25 ta’ Novembru fejn ġew organizzati Cantata bl-isem ’Int l-Għaxqa tagħna O Katarina’ (mużika tas-Surmast Direttur Josef Grech u lirika tas-Sur Mark Tonna) mill-Banda Santa Katarina V.M. fil-Knisja Arċiipretali, Pellegrinaġġ devozzjonali bl-istatwa ta’ Santa Katarina V.M., marċ brijuż tal-Aħħar Tridu, Festival ta’ Baned u Tislima mill-Banda Santa Katarina V.M. lill-Patruna tar-Raħal f’Jum il-25 ta’ Novembru

2019 – Inawgurazzjoni tal-Monument ta’ Santa Katarina V.M. fid-daħla taż-Żurrieq mill-President ta’ Malta E.T. Dr. George Vella u mbierek mill-Arċisqof Emeritus Pawlu Cremona.

2020 – Minkejja li l-Festa ta’ Santa Katarina V.M. saret b’mod ridott ħafna, minħabba l-pandemija COVID-19, il-Banda Santa Katarina V.M. daqqet waqt il-Quddiesa ta’ Ċelebrazzjoni li saret nhar is-Sibt 21 ta’ Novembru kif ukoll sellmet lill-Patruna tagħna b’mod virtwali meta l-Bandisti mid-djar tagħhom daqqew l-Innu ’Saltan Fostna Katarina’ li xxandar fuq il-paġna uffiċjali ta’ facebook tas-Soċjetà

2021 – Il-Banda Santa Katarina V.M. waqt il-Pandemija COVID-19 iddoqq nhar it-Tlieta 31 t’Awwissu 2021 waqt il-Quddiesa ta’ Jum id-Devoti li saret fil-Knisja ta’ Santa Katarina V.M. fiż-Żurrieq kif ukoll f’nhar il-Festa ta’ Santa Katarina V.M. jiġifieri fil-5 ta’ Settembru fl-istess Knisja Arċipretali meta hemm apparti s-sehem fil-Quddiesa tal-Festa ta’ filgħaxija, daqqet ukoll l-Innu lil Santa Katarina V.M. mużika tas-Surmast Espedito Deguara u versi ta’ Emanuel Pamier Cecy. Lejlet il-Festa, il-Banda Santa Katarina V.M. esegwiet Programm Mużikali storiku f’Misraħ ir-Repubblika. Il-Banda Santa Katarina V.M. kienet l-unika Banda fiż-Żurrieq li fis-sena 2021 wettqet programm fuq barra waqt il-Festa tagħha.

2021 – Is-Soċjetà Mużikali Santa Katarina V.M. għaddiet taħt it-tmexxija tas-Sur Josef Cachia

2022 – Jitwaqqaf il-Kor tat-Tfal bl-isem Vox Coeli fi ħdan is-Soċjetà Mużikali Santa Katarina V.M. Fl-istess sena s-Sezzjoni Żgħażagħ Palmisti kienet l-ewwel sezzjoni żgħażagħ fiż-Żurrieq li wettqet skambju ma’ żgħażagħ oħra fl-Unjoni Ewropea ġewwa Galati fir-Rumanija. Dan seħħ permezz tal-proġett taħt l-isem Sustaining  Cultural Heritage through Youth Activism, liema proġett kien finanzjat taħt l-iskema ErasmusPlus.

2023 – Is-Soċjetà Mużikali Santa Katarina V.M. tirregala lill-Knisja Arċipretali ta’ Santa Katarina V.M. taż-Żurrieq it-tieqa tal-istained glass bix-xbieha ta’ Santa Katarina V.M., liema tieqa ssostitwixxiet dik li kien hemm preżenti fil-faċċata tal-Knisja Arċipretali.

2023 – Il-Banda Santa Katarina V.M. tkun impenjata fi programmi mużikali barra minn xtutna għad-9 darba fl-istorja tagħha. Din id-darba il-Banda Santa Katarina V.M. żaret Lleida ġewwa Spanja fejn hemm hi ħadet sehem fil-FEM Banda International Festival 2023.

2024 – Is-Soċjetà Mużikali Santa Katarina V.M. iċċelebrat l-anniversarju tal-160 Sena mit-twaqqif tas-Soċjetà.

2024 – Is-Soċjetà Mużikali Santa Katarina V.M. tiġi dikjarata rebbieħa tal-Premju Ġieh l-Artiġjanat Malti 2023 bil-proġett tal-linef li saru biex jintramaw fi Triq San Mikiel fil-Festa Titulari.

2024 – Fit-tieni jum tat-Tridu, waqt il-Programm Mużikali mill-Banda Santa Katarina V.M., ġiet mikxufa niċċa b’xbieha artistika ta’ Santa Katarina V.M. fis-sede tas-Soċjetà.